Loading...
1. Lekholo la linku kaofela
Le ne le le ka sekeng,
E 'ngoe ho tsona ea tsoa, ea thoba.
Ea balehela naheng;
Har'a lithota le lithaba.
Ke ela e lelerang fela. (bis)
2. Molisa o siea nku tse ling,
O tsamaea ka matla;
O ea batla nku e lahlehileng,
Oa batla, oa pheella.
Utloang! Oa hoa, o nts'a hoa:
U kae na, u kae na, nku ea ka? (bis)
3. E 'ngoe fela o e batlela'ng,
Tse ling li sa le ngata?
O re: nku eo ruri ke e ratoang,
Ke eona ea bohlokoa.
Oho, mphollelleng, kea rapela,
E kae na, e kae, nku eo ea ka? (bis)
4. O hloa meepa le lithota,
O ea methipoloheng;
Har'a mafaru, har'a linoka,
Likhohlong le liqhooeng.
Hohle mohoo oa utloala:
U kae na, u kae na, nku ea ka?
5. Lipula, lifefo, lirame,
Letsatsi le bohale,
Lefifi le leholo le nyene,
Che, ha a li tsotelle.
O nts'a tsamaea o nts'a hoa: (bis)
U kae na, u kae na, nku ea ka?
6. Ha a s'a shoele ke letsapa,
A fufuletsoe mali,
'Mele kaofela o le maqeba,
Jo, a utloa poboli.
A tsoa meokho, a hlomoha:
Ana ke uena na, nku ea ka?
7. Mohlomong nku eo e n'e oetse,
E bile ea fafoha.
'Me a e sibolla e fokotse,
E le khatheng la ho shoa.
Tlatse joale ea utloahala:
Thabang, ke fumane nku ea ka? (bis)
8. Maholimo a tlatsa lefatše;
Har'a makhotla-khotla,
Hohle ke mehoo, ke litlatse;
Ba thaba, ba nyakalla,
Ba hlohoma ka ntsoe le le leng:
Thabang, nku ea Morena e teng! (bis)