Loading...
8.7.8.7.D.
1. Bolibeng joa mahlomola,
Moo ke neng ke tebile,
Ha ke se ke ea timela,
Jesu, u n'u nkhopole;
Ua hlaha, ua ntutubolla,
Ka tsota lintle tsa hao,
Ka tseba le ho nyakalla,
Hoba ke bone mohau.
2. Empa ke sa ntse ke khasa;
Che, esita le joale
Matsoalo a sa ntlhokisa
Tumelo ea sebele,
Ke hopola libe tsa ka,
Ke ntse ke itelela,
Ke mpa ke lebala ngaka
E reng, e ka mphekola.
3. Jesu, u itse ho rona;
Tlong ho 'na, le se tšabe!
Ha se meokho ea lona
E ka le hlatsoang libe;
Ke 'na ke le fang tšoarelo,
Ke 'na ea le folisang!
Morena, ha u rialo,
Re ka belaela joang?