Opela pelo ya me

Opela, pelo ya me,
opela lobokong;
o boke Molaodi
yo o legodimong.
Ke tla mo opelela
ke le mo lefatsheng,
ke mmaka ka difela
ke le boitumelong.

Ke sego, fa ke itse
kwa thuso e tswang teng
Jakobe o e bonye,
e tlhaga Modimong.
Yo ‘ ineetseng Morena
ke yo o humileng;
o phologile mono
le kwa bosakhutleng.

Mong wa dithata tsotlhe
ke yo o dirileng
ka tlhaloganyo tota,
ga go se ‘ tlhaelang:
Lefatshe, legodimo,
tse tsotlhe tse di teng,
bontsintsi jwa ditlhapi
metsing mo mawatleng.

Ene o ikanyega
go ba ba dumelang;
ga a tlhokomologe
yo o mo rapelang.
E bile o femela
ba ba gatelelwang.
Lefoko le tlhomame
le a le buileng.

O na le mekgwa ‘ mentsi
go golla mo losong.
O otla le go jesa,
fa re le mo tlaleng.
Le fa go se kotulo,
re ba ba tla kgorang;
ka tshegofatso ya ‘gwe
re tla tswa tlalelong.

Morena ke lesedi
la ba ba foufetseng.
O thusa le balwetsi,
ke yo ‘ ba fodisang.
O rata badumedi
ba ba mo ikanyang;
ba mo fitlhela e le
Tsala e’ gaisang.

Batlholagadi botlhe
ba ba mo rapelang,
le tsona dikhutsana,
ke yo ‘ di agelang.
O ipusolosetsa
go ba ba mo ilang.
O ba thubela matlo,
mo ba agileng teng.

Nna, ka ke le lerole,
ke ka go boka jang?
O Kgosi ya dikgosi,
ke tshwana le bojang.
Mme ka o intshenketse
go nna mo phuthegong,
ke tla godisa leina
la gago mo bathong.