Loading...
- Ao, mowa wa me, baka
Morena yo o go ratang;
o se ka wa lebala
tse ene o di dirileng;
o itshwaretse dibe
tse di go imetseng,
wa pholosiwa jalo,
wa tsholwa bongwaneng;
mme wa nnajaaka bontswi
ba ba nonofileng.
Morena o boloka
ba ba mo ikanyang. -
O ne a re itsise
go rata ‘ gagwe molaong
le bopelontle jwa ‘gwe,
e le yo ‘ re itshwarelang;
o khutla go galefa,
fa re le thapelong;
re kopa boitshwarelo
ka yo o re swetseng;
o bopelotlhomogi
go ba ba mmoifang;
maleo a latlhetswe
kgakala lewatleng. -
Morena o direla
ba botlhe ba ‘ mo ikanyang;
o tshwana le rra-bana
yo o lorato mo baneng;
o itse rona batho,
fa re tswa leroleng;
re tshwana le dithunya
tse di tlhotlhoregang;
fa phefo e di foka,
ke tse di nyelelang;
le ene motho jalo
ke yo o tla felang. -
Mme bopelotlhomogi
jo bo leng teng mo Modimong
bo tlhomametse ruri,
ee, bo ntse ka bosakhutleng;
bo ikanngwa ke bone
ba ba mo phuthegong
kajeno le ka gale
le ka go sa feleng;
sa rona ke go mmoifa,
re le kgolaganong,
go supa ka ga gagwe,
re le ba ba mmakang.
5.Morena o a bakwa
ke baengele ‘godimong;
e bile o direlwa
ke bone boitumelong;
le rona re eletsa
go mmaka difeleng,
gore go dirafale
se se mo tshwanetseng.
A a re tlhomamise,
re nne boikanyong;
re tla mo opelela
le ka bosakhutleng.