Menu Close
1 Star2 Stars3 Stars4 Stars5 Stars (No Ratings Yet)
Loading...

Lumelang banyali

1 Lumelang, banyali,
Ba tlang ka tumelo
Ho kopanngoa ke monghali
Ngalong ea thapelo!
Bobeli bo be bong
Pelo li kenane;
Nyalo le theoe ka melao,
Tlamanang, le ane!

2 Le fane lerato
Le sa kokobeleng;
Le thusane ka lereko;
Phomotsanang tseleng!
Uena, monna, hloho,
Lisa ka bonolo,
U baballe ka hlonepho
Molekane oa hao.

3 Mosali, u khabe
Ka mosa le kutlo,
Monna oa hao a 'n'a thabe,
U mo fe lipuo!
Le tšepe hlahlobo
Ea 'Mopi oa lona;
O bea lijo le kobo
Tlung e se nang mona.

4 Isanang bophelong
Ka tsosano e ntle,
Le ahisane tumelong
Le loke kahohle.
Morena oa khotso,
U ba sireletse,
U ba tiise ka khothatso,
Ba u sebeletse.

5 Ba bone ho uena
Kholo e monate,
Ba nt'o lumelloa ho kena
Meahong ea Ntate!
Lumelang, banyali,
E-eang ka tumelo;
Le kopantsoe ke Monghali,
Katlung ea thapelo

Leave a Reply

Lumelang banyali